روابط مهمة

استعادة كلمة المرور صفحتنا على الفيس بوك
لأي مشاكل تواجهك .. لاتتردد بالإرسال لنا بالضغط هنا

 

الآن خدمة الـ rss متوفرة بمكتبتناً العربية

 

شريط الإعلانات ||

أهلا وسهلا بكم في منتديات مكتبتنا العربية **** نرجو من الأعضاء الكرام وضع طلبات الكتب في القسم الخاص بها في المنتدى الإداري العام قسم الاستفسارات وطلبات الكتب مع الشكر ***
Loading

 


   
 
العودة   منتديات مكتبتنا العربية > واحة المنتديات > قسم شؤون المنزل والمطبخ والزهور
 
 

إنشاء موضوع جديد إضافة رد
 
أدوات الموضوع ابحث في الموضوع انواع عرض الموضوع
قديم 19-07-2010, 01:42 AM   #1
جنى الجنه
أم إياد ( مستشارة وفقها الله )
 
الصورة الرمزية جنى الجنه
 
تاريخ التسجيل: Jan 2010
المشاركات: 1,990
المواضيع:
مشاركات:
من مواضيعي
 

Lightbulb اكلات صيفيه على الطريقه المصريه

السلام عليكم ورحمة الله




بمانسبة الصيف و اننا مش بنحب نقف في المطبخ علشان الحر







قلت اقول لكم على حاجة أتعلمتها من شيف شربيني ربنا يجازيه خير






كان عمل كفتة الحاتي بطريقة بسيييطة جدا










نصف كيلو لحم مفروم


بصلاية وسط مبشورة


ملعقة كبيرة لية ضاني مبشورة


(ممكن الاستغناء عن اللية مافيش مشاكل)


ملح و فلفل






البصلاية المبشورة نحط عليها ملح و فلفل و نعصرها و نطلع الماية بتاعتها و نركنها على جنب










و التفل (البصل المعصور) نحطه على اللحم المفروم و اللية و نقلب كويس اوي






نجيب العصير البصل اللي طلع و نبشر عليه طمطماية صغننة أوي


(يستحسن نص طماطماية صغننة)






و فلفل أخضر مبشور
(قرن فلفل صغنن)






و نسيب الكلام ده يتبل مع بعضه في طبق على جنب










و نصبع الكفتة






لما نبدأ نصبع الكفتة نبل ايدينا الاول في عصير البصل المتبل و نصبع


علشان الكفتة تاخد ريحة التتبيلة ديه










طيب في حد هيسأل ليه ماحطيناش البصلة المبشورة كلها على بعض من غير مانفصل عصيرها






هقول


علشان الكفتة ماتفكش يا فندم


و تكون ماسكة نفسها










هنحضر صينية و نرص في الكفتة


لو مش حاطة لية في الخلطة هتحتاجي تدهني الصينية بزيت خفيف علشان الكفتة ما تلزقش














بس كده






حطي الصينية في الفرن و لما الجنب اللي تحت يحمر نقلب على الجنب التاني لحد ما كله تكون لون بعض











لو عايزة ريحة الشوي ممكن تحطي في الصينية مع الكفتة بعد ما تستوي فحماية (فحم) مولعة في شوية ورق بصل و غطي الحلة من 5 ل10 دقائق










ممممم


الريحة تحححفة










انا بعملها في سندويتشات و عليها سلطة طحينة بتبقى تحححفة









ممكن تعملوا جنبها مكرونة و لا خضار سوتيه






بس بيني و بينكم السندويتش افضل










أرز معمر بالفراخ


من احلى الاكلات فى الصيف خفيفه وممكن تقدمى جمبها سلطه وبطاطس شيبسى اياد عندى بيحب الاكله دى جدا من غير كلام كتير هقولكم على الطريقه



هتجيبى فرخه ويستحسن تكون مجمده عندك فى الفريزر



قبل ما تفك خالص قطعتها 10 قطع


علشان التقطيع و هي ماسكة نفسها أفضل من التقطيع و هي طرية


ممكن لحمها يتهري و هي فاكة و طرية




المهم قطعتها و هي شبه مجمدة


و تبلتها بملح فلفل في العظم و كل مكان


و رصيتها في قعر طبق بايركس





و جبت كوبين ارز و غسلتهم و بشرت عليهم بصلاية صغننة و تبلتها بالملح و الفلفل


و حطيت الرز على الفراخ في الطبق البايركس







و حطيت عليهم 2 كوب لبن دافيء







و دخلتهم الفرن


و لما الريحة طلعت و بدأ الوش ياخد لون وزعت على الوش ملعقتين كبار قشطة


غطيت الوش تماماً


بس متتأخروش في الخطوة ديه علشان الرز اللي على الوش ماينشفش






و سيبوا القشطة تاخد لون في الفرن مش تحت الشواية






و بس خلاص






الصينية طالعة تححححفة


شكل الوش ذهبي جميل











و الرز مفلفل


لا معجن و لا نص سوى


و الملح مظبوط


جربوها و قولولي


على فكرة ممكن بدل الفراخ نحط حمام


و ممكن نعمله باللحم الفليتو بس نتبله بملح و فلفل و بصل مبشور و خل
علشان الخل يسهل تسويته



صينية الفراخ بالكارى

المقادير:






فرخة


(مقطعة اربع ارباع)
(ممكن تحطي اوراك بس او صدور بس)
بس انا مابعرفش آكل غير الفراخ البلدي




1بصلة كبيرة

(مقطعة مكعبات صغيرة)

1 طماطم كبيرة

(مقطعة مكعبات صغيرة)



ملعقة كبيرة كاري



ملعقة صغيرة ملح



نصف ملعقة صغيرة فلفل اسود مطحون



3ورق لوري



3 حبهان



نصف ملعقة صغيرة شطة او هريسة شطة

(حسب الرغبة)



طبعا نراعي ان المقادير ديه لاربع قطع فراخ
(فرخة يعني)
يعني لو زودنا في قطع الفراخ
طبعا هنزود في مقادير التتبيلة


الطريقه



من بالليل



تحطي قطع الفراخ في الصينية


و تغرزيها بالسكين علشان التتبيلة تتغلغل






وحطي عليها البصلة المكعبات و الطماطم المكعبات


و ورق اللوري و الحبهان


و الكاري و الملح و الفلفل






(ممكن اضافة ملعقة صلصة طماطم علشان يكون لون صوص الفراخ احمر)






و قلبيهم مع بعض كويس


خدي بالك ماحطناش اي دهون خاااالص

و مش هنحط




و غطيهم بورق فويل


و حطيهم في الثلاجة لتاني يوم لما يجي وقت الطبخ






و وقت الطبخ طلعيها من التلاجة بنفس الصينية و اللفة اللي بورق الفويل


و حطيها في فرن ساخن

(تكوني مسخناه من قبل كده)






بتاخد من ساعة الا ربع لساعة






بعد ساعة الاربع


اكشفي الورق الفويل علشان تشوفيها استوت ولا لاء






لو لقيتيها استوت سيبيها مكشوفة في الفرن شوي علشان وجهها يحمر


ممكن تحطيها دقيقتين تحت الشواية








ممكن تقدم في الصينية زي ماهي



و ممكن بعد ما تتحط تحت الشواية و تاخد لون نقدمها علي رز ابيض او ارز بالكاري









البيكاتا بصوص الماشروم


او الفيلية بصوص المشروم




ندخل بأه علي المقادير علي طول


نصف كيلو لحم فيلية


(عرق فيليه)


(و ممكن تمشي بلحم البوفتيك)


ماشروم مقطع


(معلب ولو طازة يكون احسن طبعا)


فريش كريم


(ديه بتاعة جهينة)

و في كمان عند جهينة كريمة طبخ
بس انا كتير بعمل بديه عادي يعني مافيش فرق واضح

(الناس اللي بتعمل رجيم يستخدموا كريمة نباتي نفس الطعم و ارخص كمان)


بصل مبشور و عليه ملح و فلفل


شوية دقيق


2 ليمون


ربع كوب خل


(ممكن اقل )

زيت


الطريقة






نبدأ الاول في تتبيل الفيليه او البوفتيك بالبصل المبشور و الملح و الفلفل و اليمون و الخل و نتركة علي الاقل نصف ساعة


(طبعا يستحسن يقعد في التتبيلة اطول من كده)






نبدأ بأه في التسوية


نجيب طاسة كبيرة


و نحط فيها زيت


(يا دوب نغطي قعر الطاسة)


و نحط الفيليه في الدقيق من الجانبين


(نعفره يعني بالدقيق)


و بعدين نحطه في الطاسة


(طبعا الزيت يكون سخن)


بس بمجرد ما نبدأ في وضع الفيليه نهدي النار علشان اللحم يستوي من بره و من جوة


و نعمل باقي كمية الفيليه بنفس الطريقة


لحد ما نملي الطاسة


و نسيبها شوي


(نغطيها ثلاث دقائق)


و لما الوجه اللي في الزيت يصبح لونه بني نقلب علي الوجه الاخر


(ماتخافوش لما يغمق شوي)


و نسيبة نفس الفترة اللي فاتت


و لو لسة باقي فيليه تاني


يبقي نشيل الكمية ديه في طبق جانبي و نعمل كده مع باقي الكمية لغاية ما كمية الفيليه تخلص


و بعد ما تنتهي الكمية


نرجع الفيلية كله تاني في الطاسة و نحط عليه الماشروم و نقلب حتي يغمق لون المشروم شوي


(دقيقتين مثلا)


و بعدين نزود شوية ماية


(ممكن نزود من الماية بتاعة المشروم لو ستخدمتوا المعلب)


يا دوب نغطي الفيليه و المشروم


و نسيبهم يغلو شوي علشان الدقيق اللي في اللحمة يفك و يعملي صوص غليظ


و لما نتأكد ان اللحم استوي


نحط الكريمة و نقلب


نحط لحد ما يصل للون اللي بتحبوه


في ناس بتحب الصوص يكون غامق فتحط الكريمة قليلة


و اللي بيحب الصوص فاتح يكتر كريمة لحد ما يصل للون اللي عايزينه


و نقلب كويس


و نغطي و نسيبها تغلي شوي دقيقتين كمان


ملحوظة:


لو عايزين الصوص يكون كتير


كتري كمية الماية اللي حطيتيها بعد المشروم


طبعا بنقدم جنبها مكرونة او رز ابيض

مش لازم طبعا مكرونة اسباجيتي
انا بحب اعملها بمكرونة فيونكة او قواقع او سوستة
علشان الاولاد يعرفوا يكلوها



طيب لو عايزين تعملوا مكرونة زي اللي فوق ديه نعملها ازاااااي


نسلق المكرونة بتاعتنا عاااادي


و في طاسة نحط ملعقتين زبده سخنين


و نشوح فيهم شوية جزر مبشور


ونطفي النار


و نحط ورق كسبرة خضرا مقطع صغير خالص


ونقلب كويس اوي


و بعدين نحط المكرونة علي الخلطة ديه و نقلب


هتطلع زي المكرونة اللي في الصورة فوق




انا بأه بعد ما اللحم يستوي بشيل اللحم و احط المكرونة في الصوص و اقلب علشان المكرونة تشرب من الصوص


و بعدين اقدم المكرونة بالصوص


و جنبها طبق في اللحم بشوية شوص صغيرين


ممكن طبعا بدل فيليه اللحم نحط فيليه فراخ


زي ده

طبعا اللي في الصورة بصوص الليمون



نفس الخطوات بالضبط بس ناخد بالنا ان الفراخ بتستوي اسرع من اللحم


في بأه شوية افتكاسات بعملها لو مش عندي مشروم


ممكن اعمل الفيليه بس بصوص الفلفل الاسود


طعمه جميييل جدا


فلفل اسود محمص في طاسة من غير أي اضافات علشان يسهل اني اجرشه


و بعدين بأي حاجة علي شكل اسطوانه ادوس عليه لحد ما يتجرش تماما


و بعدين احط ملعققة كبيرة من الفلفل المجروش بدل الخطوة بتاعة المشروم


ممكن بصوص الليمون


بحط ربع كوب عصير ليمون بدل خطوة المشروم


و صوص المستردة


احط ملعقتين كبار مستردة بدل خطوة الشروم و قلب حتي التجانس مع اللحم


و ده بينفع اكتر لو هنعمل البيكاتا بالفراخ بدل اللحم


و صوص الجنزبيل


اضع ملعقتين جنزبيل مبشور و اشوحه مع الحم علشان اللحم ياخد طعمه


و صوص الشبت


ملعقتين شبت مفروم و برضه احطه بدل المشروم


كله نفس الخطوات بالضبط


بس بدل الماشروم


بنحط الفلفل الاسود او أي حاجة تانية و نقعد نقلب كويس علشان اللحم يشرب منه


و بعدين نزود الماية عادي و بعدين الكريمة زي ما عملنا في الطريقة الاساسية


طيب لو عايزة تعملي الصوص ده لوحده


يعني يكون علي جنب مش معمول مع حاجة


يبقي في طاسة نحط ملعقة زبدة و احط بصلة وسط مبشورة و اشوحها شوي لحد ما يذبل البصل و بعدين احط المشروم او الفلفل الاسود او الليمون ..... الخ


و بعدين ازود شوية ماية


و بعدين احط الكريمة










و بالهنا و الشفا







__________________

جنى الجنه غير متواجد حالياً   رد مع اقتباس
قديم 19-07-2010, 01:51 AM   #2
جنى الجنه
أم إياد ( مستشارة وفقها الله )
 
الصورة الرمزية جنى الجنه
 
تاريخ التسجيل: Jan 2010
المشاركات: 1,990
المواضيع:
مشاركات:
من مواضيعي
 

افتراضي رد: اكلات صيفيه على الطريقه المصريه

الايس كريم

من الحاجات الى لازم تكون موجوده فى الصيف بصراحه انا مسغناش عنها ابدا في الصيف




المقادير:


في حدود 3/4 كيلو مانجة مثلا


(او أي نوع فاكهة انت عايزة تعمليه)






و لو شوكولاته يكون في حدود نصف كيلو شيكولاتة خام و نسيحها

(500 جرام يعني)






علبة لبن مكثف نستلة او أي نوع

(ال370 جرام اللي هي اصغر حاجة)






علبة جيلي من نفس نوع الفاكهة

(لو مش متوفر النوع يبقي علي الأقل اللون)

(ممكن طبعا نستخدم الجيلاتين الشفاف)






بس كده المقادير كده خلاص



الطريقة:


نحضر الجيلي زي ما هو مكتوب عليه في التعليمات بالضبط


هيطلع لنا 2 كوب سائل الجيلي


نسيبه لحد ما يبرد شوي


نكون محضرين الفاكهة اللي هنستخدمها


تكون متقطعة


نحطها في الخلاط مع الجيلي و نضرب في الخلاط حتي التجانس التام


و بعدين نضيف اللبن المحلي المركز بتاع نستله


و نضرب كويس و بعدين نصب الخليط ده في علبة في الفريزر


ممكن نحط مع الخليط قطع من الفاكهة و نقلبها بتدي طعم جميل برضه


تخيلي كده انت بتاكلي ايس كريم فراولة و فيه قطع فراولة ي


و ياسلام لو مكسرات كمان


بالذات مع الشوكولاته البندق بيخلي طعمها رااااائع


و كمان ممكن نحط قطع من الشوكولاته في الخليط بتدي شكل جميل ساعة الغرف


و نسيبة علي الأقل ساعتين علشان يمسك نفسة و يكون قوامه زي الآيس كريم


طبعا علي حسب الفريزر بتاعك


ممكن يتطلب يقعد في الفريزر ل6 ساعات






بس بيطلع كريمي و طعم الفاكهة الفريش واضح جدا فيه


بيطلع تحححفة


كل اللي هيدوقة مش هيصدق انه معمول في البيت


و من غير ماكنة آيس كريم كمان


ممكن طبعا يتقدم كده سادة او يتقدم مع صوص حسب نوع الآيس كريم اللي معمول


انا بصراحة بستسهل و اجيب مربي و أخفها علي النار باشوية ماية صغيرين و استخدمها صوص



مربي مانجة او مشمش او فراولة او تين


علي حسب نوع الفاكهة المستخدم في الأيس كريم


ممكن تعملي صوص كراميل


كوب كبير و نصف سكر


نصف كوب كبير كريمة لباني

(فريش كريم)


نصف كوب كبير بندق مجروش

نحط السكر في حلة علي نار هادية و نقلب بالراحة لحد ما يسيح و لونة يكون كراميل غامق بس اوعوا يتحرق منكم


و بعدين نحط عليه الفرش كريم و نقلب لمدة دقيقة كده و نحط البندق و نقلب علي النار لحد ما قوامه يغلظ و يصبح عندنا الصوص جاهز

(تقريبا من 4 ل5 دقائق تقليب متواصل)


ممكن صوص شيكولاته


نشيل شوي من الشوكولاته الخام اللي سيحناها


و نحط عليه زبدة و فريش كريم و نقلب كويس لحد التجانس التام و يكون في قوام الصوص


بس مانكترش الفريش كريم علشان ماتأثرش علي لون الشوكولاته
او نعمله بالطريقة ديه:


نصف كيلو لبن


ملعقة كبيرة مليانة كاكاو


نصف كوب كبير سكر

(100 جرام)


ملعقة كبيرة زبدة لينة


150 جرام شوكولاته دارك قطع
نحط اللبن و عليه السكر علي النار و نقلب كويسو لما يغلي نهدي النار شويو نحط الشوكولاته القطع و الكاكاو و نفضل نقلب علي نا هادية خاااالص حد ما الشوكولاته تسيح تماما في الأخر نحط ملعقة الزبدة علشان التلميع


طيب كده احنا خلصنا الآيس كريم


و الصوصات كمان

طبعا ممكن تشتري بسكويت جاهز من بره
و تعملي ساندويتش ايس كريم
زي الويتش اللي بيتباع في السوبر ماركت
و ممكن نقدمه بالأشكال ديه






يالا بأه بالهنا و الشفا

__________________

جنى الجنه غير متواجد حالياً   رد مع اقتباس
قديم 19-07-2010, 01:19 PM   #3
أم ذر
مشرفة ( وفقها الله )
 
الصورة الرمزية أم ذر
 
تاريخ التسجيل: Jul 2009
الدولة: قلعة الاسود
المشاركات: 28,499
المواضيع:
مشاركات:
من مواضيعي
 

افتراضي رد: اكلات صيفيه على الطريقه المصريه

سلمت يداك على هذا الابداع
بارك الله فيك
نحن نستخدم نفس طريقة طبخك ولكن مع بعض الاختلافات في الكفتة وتسمى عندنا كباب
كذلك صينية الفراخ .
وفي الرز المعمر بالفراخ لا نستخدم الرز ربما هي أكلة ثانية ولكن تقريباً بنفس المقادير .

__________________
لا تكـره مـن يغار منـكّ
بَـل
إحتــرم تلـكَ الغيــرة
فيه !
ن غيرته ليسـَت سوى غلافعترافه بــأنك

" أفضـل منــه "
أم ذر غير متواجد حالياً   رد مع اقتباس
قديم 19-07-2010, 03:42 PM   #4
جنى الجنه
أم إياد ( مستشارة وفقها الله )
 
الصورة الرمزية جنى الجنه
 
تاريخ التسجيل: Jan 2010
المشاركات: 1,990
المواضيع:
مشاركات:
من مواضيعي
 

افتراضي رد: اكلات صيفيه على الطريقه المصريه

شكرا لذوقك اختى الغاليه وهذا من بعض ماعندكم فقد تعلمنا الكثير منكى وامتعتينا بطبخاتك الرائعه

وياريت تعلمينى بيتعمل ازاى بتحطى ايه بدل الرز ؟ انا منتظراكى

__________________

جنى الجنه غير متواجد حالياً   رد مع اقتباس
قديم 19-07-2010, 04:37 PM   #5
فــلــة
وفقها الله
 
الصورة الرمزية فــلــة
 
تاريخ التسجيل: Jul 2010
المشاركات: 9,980
المواضيع:
مشاركات:
من مواضيعي
 

افتراضي رد: اكلات صيفيه على الطريقه المصريه

مشكوووووور والله يعطيك الف عافيه

فــلــة غير متواجد حالياً   رد مع اقتباس
إنشاء موضوع جديد إضافة رد


يتصفح الموضوع حالياً : 1 (0 عضو و 1 ضيف)
 
أدوات الموضوع ابحث في الموضوع
ابحث في الموضوع:

بحث متقدم
انواع عرض الموضوع

ضوابط المشاركة
لا تستطيع إضافة مواضيع جديدة
لا تستطيع الرد على المواضيع
لا يمكنك اضافة مرفقات
لا يمكنك تعديل مشاركاتك

BB code is متاحة
كود [IMG] متاحة
كود HTML معطلة

الانتقال السريع

المواضيع المتشابهه
الموضوع كاتب الموضوع الأقسام الرئيسية مشاركات المشاركة الاخيرة
موقع اكلات شهية بدر حلب كتب الأسرة بصيغ أخرى 4 16-04-2011 02:55 PM
اكلات عالمية شيماء المشهداني كتب الأسرة المصورة 5 02-03-2011 04:19 PM
اكلات سورية أم ذر قسم شؤون المنزل والمطبخ والزهور 14 09-10-2010 07:08 PM
الفطير المشلتت على الطريقه المصريه جنى الجنه قسم شؤون المنزل والمطبخ والزهور 11 31-07-2010 11:03 PM
اكلات مصريه فى العيد جنى الجنه قسم شؤون المنزل والمطبخ والزهور 10 20-07-2010 01:01 PM


الساعة الآن »09:32 AM.


 Arabization iraq chooses life
Powered by vBulletin® Version 3.8.5
.Copyright ©2000 - 2014, Jelsoft Enterprises Ltd